احترام راي العقال… عنوان العقل وهيبة الرجل

بقلم / رمزي الجابري
الخميس 6 نوفمبر 2025

في كل زمان يبقى احترام العقال وتقدير رايهم علامه على رجاحة العقل وحسن التربيه والشخص اللي يعرف قدر من هم اكبر منه سن وخبره يرفع قدر نفسه قبل لا يرفع قدر غيره لان احترام العاقل مو مجامله، هو ادب ووعي يبين اصل الانسان ورجاحة فكره.
اليوم نلاحظ ان بعض الشباب يشوفون نصيحة العقال تقييد او تدخل بس الحقيقه انها حمايه ووقايه من الوقوع في الغلط والعاقل لما يتكلم ما يتكلم من فراغ، يتكلم من تجربه عاشها وشاف فيها الخير والشر والناس والمواقف.

واللي مايحترم راي العاقل يخسر قبل لا يبدأ لان المجتمع بطبعه يقدر اللي يسمع ويحترم ويزهد في اللي يرفع صوته على من هم اكبر منه او يتجاهل نصيحتهم والرجل اللي ما يوقر الكبير ولا يحترم المشوره ما يحترم وجهه الناس مهما بلغ علمه او منصبه.
الاحترام ماهو ضعف ولا تقليد اعمى، هو سلوك نابع من الحكمه واللي يعرف ينصت يعرف يتقدم لان من شاور العاقل كنه استعار من عمره تجربه ومن عقله طريق آمن للصواب.

وفي جانب ثاني من الحقيقه لازم يعرف كل شخص انه مهما بلغ حجمه او وصل منصبه ما راح يكبر في عيون الناس الا بقدر اهله وعقاله لان الناس تشوف الاصل قبل الاسم وتشوف الموقف قبل المنصب.

العاقل والاهل هم الجذر اللي يثبتك واللي ما له جذر ما له ظل واللي يتنكر لاهله او يستخف بعقاله يخسر مكانته قبل ما يخسر احترامه لان الناس ما تحترم من رفع نفسه على من علموه ووقفوا معه
واذا نبي الصلاح للبلاد لازم نبدأ من نفسنا قبل كل شي لازم نصحح انفسنا ونرتب امورنا مع اهلنا وعقالنا لان الشخص المبعثر داخله ما يقدر يصلح غيره واللي ما يعرف حدوده وما يحسب خطوته يصعب عليه ان يكون قدوة للغير.

الاصلاح يبدأ من البيت ومن الناس اللي حولنا ومن طريقة تعاملنا مع الكبير والصغير ومن احترامنا لرأي العقال واللي وقفوا معنا وقت ما كنا نحتاجهم، لان الانسان الواحد اللي ما يقدر نفسه وما يربط نفسه بعقاله واهله يصعب عليه يحقق الصلاح للغير.

ولازم نكون شخص واحد، مو مشتت نعرف قيمنا ونحافظ عليها لان لما نرتب حياتنا ونصون علاقتنا مع اهالينا وعقالنا، تصير خطواتنا محسوبة وقراراتنا صحيحه ونصير مثال للناس اللي حوالينا، ونساهم بشكل فعلي في اصلاح المجتمع حوالينا.
اللي يحترم نفسه ويحترم اهله وعقاله، يكون اساس صلب لبناء اي اصلاح، لان كل شي يبني على انسان واعي بمسؤولياته، ما يفرط بكرامته ولا بكرامة اهله، وما يمشي خطوة بدون تفكير، وهذا اللي يقدر يغير واقعنا نحو الافضل.

والحقيقة لازم نعترف بيها ان الاوضاع اللي نعيشها اليوم احنا اكبر سبب فيها لان كل واحد فينا شايف نفسه ابو العريف وخلق متعلم وكامل، وهو الوحيد اللي يعرف يدير الوضع وما يسمع لا نصيحة ولا لراي احد.
هالشي خلق فوضى وعشوائية وكل واحد يمشي بطريقه بدون حساب وينسى انه تصرفه ما يمس نفسه بس لكن يمس اهله وعقاله والمجتمع كله. وكل خطوة بدون تفكير تأثر على غيره وكل كلمة بدون حساب تضيع قيمه الانسان بين الناس.

وفي الختام عسى الناس تجي على الصح وتبطل التجاوزات واحتكار بعضها البعض وتبطل البغض والحسد وكل واحد يشوف كيف يسقط اخوه عشان يطلع مكانه وعلى هذا الحال أن دفرك لي وراك دفر لي قدامك. الوقت زاد فيه التعليم بس للأسف قلت فيه الفطنه والحنكة لي كانوا يتحلون بها الأولين على جهلهم.